O BNG de Soutomaior presenta unha moción para que Sogama garanta a recollida de voluminosos

Tamén pide que se axilice a aplicación do bono social da tarifa eléctrica

No Pleno que se celebra o vindeiro xoves día 24, o BNG de Soutomaior presenta unha mocións na que insta ao Concello de Soutomaior a que se garanta a recollida de residuos voluminosos –logo do anuncio do cesamento da recepción destes refugallos por parte da Sociedade Galega de Medio Ambiente (Sogama)– e outra na que solicita que se axilice a aplicación do bono social da tarifa eléctrica.

O Grupo Municipal lembra que a decisión de Sogama de deixar de recoller os voluminosos foi adoptada de xeito unilateral, sen ningún tipo de negociación previa cos concellos afectados –que terán que facerse cargo, individualmente, da recollida e entrega deste tipo de residuos a un xestor autorizado–.

Con este anuncio, Sogama podería estar a incumprir as condicións pactadas cos concellos no momento da súa adhesión, sen que nin a Xunta nin a propia entidade lles ofrezan ningunha solución alternativa e viábel aos concellos afectados. A falla dun sistema homoxéneo para a retirada destes residuos e o incremento significativo dos custes –máxime nun momento no que como consecuencia da crise económica e das deficiencias do sistema de financiamento local as facenda municipais están a pasar por situacións moi difíciles– podería derivar na proliferación de vertedoiros incontrolados.

No mellor dos casos, cando o tratamento se faga conforme á legalidade e por un xestor autorizado, esta nova práctica podería trasladar o incremento dos custes ao recibo do lixo que terían que soportar os veciños e veciñas de Soutomaior.

Ante esta situación, o Grupo Municipal do BNG solicita instar á Xunta de Galiza ao mantemento da recepción de residuos voluminosos procedentes dos municipios adheridos, nas condicións que o viña facendo até agora, para o seu posterior tratamento por un xestor autorizado e conforme á normativa vixente. No seu defecto, o BNG insta á Xunta de Galiza a que achegue unha solución alternativa e viábel, que non supoña un incremento do recibo do lixo dos concellos afectados.

Bono Social da Tarifa Eléctrica

A liberalización operada no sector eléctrico, lonxe de significar unha mellor prestación do servizo eléctrico nos fogares e lonxe de abaratar o custe da factura eléctrica, está a ocasionar unha confusión crecente e un incremento no gasto repercutido polo subministro eléctrico á maioría dos consumidores.

A creación do denominado “bono social”, que consiste nunha bonificación na factura eléctrica por unha contía igual á diferenza entre o valor da tarifa de último recurso e unha tarifa reducida, pretende corrixir a importante repercusión económica que o novo sistema de tarifas ocasiona na economía da maioría dos consumidores domésticos.

Os potenciais beneficiarios do bono son as persoas titulares dun punto de subministro na súa vivenda habitual de 60 ou máis anos de idade que acrediten ser pensionistas do Sistema da Seguridade Social que perciban as contías mínimas, as que acrediten ser familias numerosas, as que acrediten formar parte dunha unidade familiar con todos os seus membros en idade de traballar en situación de desemprego e as que teñan contratada unha potencia menor de 3kv.

Estes posíbeis beneficiarios, ademais da demora na posta en marcha efectiva do bono social, están a sufrir atrancos inxustificados, como incumprimentos das empresas distribuidoras e comercializadoras de enerxía eléctrica no relativo á publicidade do procedemento e o ofrecemento de información exhaustiva, a imposibilidade dunha atención presencial dado o escaso número de empresas comercializadoras existentes, ou mesmo a necesidade de achegar múltiple documentación acreditativa de diversos organismos e administracións públicas, entre eles o concello.

Neste sentido, o Grupo Político Municipal do BNG proponlle ao Pleno instar ao Ministerio de Industria, Turismo e Comercio e a Comisión Nacional de Enerxía a adoptaren as medidas necesarias que garantan a extensión a todos os beneficiarios do bono social, e a súa aplicación efectiva nos prazos estabelecidos pola normativa vixente.

Tamén pide instar ás Consellarías de Traballo e Benestar, e de Economía e Industria, e ao Instituto Galego de Consumo a poren en marcha, de xeito urxente, Planos de Comunicación, Información e Asesoramento sobre as últimas modificacións no sistema de tarifas eléctricas e da aplicación do bono social, orientadas tanto á poboación en xeral como especificamente aos potenciais beneficiarios.

Por último, o BNG reclama un servizo de información, asesoramento e colaboración na tramitación da solicitude do bono social, por parte do Concello de Soutomaior, onde se facilite ademais dun xeito áxil toda documentación acreditativa que o beneficiario deba obter do concello.

O Concello de Soutomaior veta unha charla do BNG sobre a Gripe A

O PP impide a celebración da conferencia impartida xefe de Servizo de Medicina Preventiva do Complexo Hospitalario de Pontevedra no Multiusos de Arcade

O BNG de Soutomaior denuncia que o Goberno Municipal do PP impediu a celebración dunha conferencia informativa impartida polo doutor Luís Vázquez Vizoso, xefe de Servizo de Medicina Preventiva do Complexo Hospitalario de Pontevedra, sobre a Gripe A no Multiusos de Arcade. Vázquez Vizoso, experto en Medicina Preventiva, vén de ser elixido pola Xunta de Galiza un dos 9 recoñecidos profesionais que forman parte do Comité Científico do Plan Galego de Preparación e resposta a pandemia da Gripe A.

Ante a negativa da concelleira de Cultura, Dolores Cernadas, a que se celebrase a charla nas instalacións do Multiusos –que non contaban con ningún tipo de reserva para o día e a hora solicitada polos nacionalistas– o BNG viuse obrigado a organizar a conferencia o vindeiro venres día 18 na Biblioteca Municipal, edificio que conta con numerosas deficiencias e que carece de acceso para persoas con mobilidade reducida.

O Goberno Municipal do PP demostra unha vez máis a manipulación das infraestruturas, instalacións e servizos públicos ao seu antollo, tentando negarlles aos veciños e veciñas a celebración dunha conferencia de interese xeral para a sociedade sobre a Gripe A. Non é a vez primeira que o Concello de Soutomaior boicotea un acto informativo organizado polo BNG ao non cederlle as instalacións do Multiusos, aínda sen contar con ningunha actividade programada para o día e a hora solicitados.

No Pleno celebrado en novembro do pasado ano, o Grupo Municipal do BNG solicitou coñecer os criterios que emprega a Concellaría de Cultura á hora de conceder o Multiusos, o campo municipal de fútbol ou o local de ensaio da escola de Alxán. Os nacionalistas reclamaron un regulamento de reservas e uso das instalacións –como co que xa contan as pistas de tenis e pádel do Concello ou o pavillón municipal– para acabar coa discriminación para o uso destes espazos.

O BNG pídelle ao PP que todas as entidades e organizacións do municipio conten cos mesmos dereitos á hora de empregar un espazo cultural concibido para o uso de todos os veciños e veciñas, non só do PP e entidades afíns.

A Xunta deixa sen clase o alumnado dunha escola de Soutomaior pola falta de mestres

O BNG leva o atraso do curso escolar na Escola Infantil de Romariz ao Parlamento e insta á Consellaría de Educación a explicar os motivos polos que non contratou un substituto ou substituta

A falta de mestres vén de provocar o atraso no inicio do curso na Escola de Educación Infantil (EEI) de Romariz –en Soutomaior–, onde 19 alumnos e alumnas ficaron o xoves e o venres sen clases. O Grupo Municipal do BNG sinala que a mestra titular do centro se atopa de baixa por maternidade e denuncia que a Consellaría de Educación non realizou o chamamento do substituto ou substituta.

Os pais e nais do alumnado afectado non recibiron información ningunha do atraso do inicio do curso e criticaron non terse decatado de que os seus fillos e fillas quedarían sen clases até o propio xoves 10 de setembro –día no que comezou a tempada escolar para os alumnos de Infantil e de Primaria–. Chegadas ás 10.00 horas da mañá, as familias das crianzas abandonaron o edificio ao comprobar que non aparecía ningún mestre ou mestra para atender os nenos e as nenas. E é que o Goberno Municipal do PP en Soutomaior e a Consellaría de Educación non os informaron nin sequera a través dun aviso ou dun cartel na porta do centro.

O BNG de Soutomaior censura que o Goberno municipal do PP non xestionase con anterioridade a substitución da mestra que se atopa de baixa por maternidade. O Grupo Municipal considera que a responsábel de Educación do Concello de Soutomaior debería ter confirmado a comezos de setembro que o curso ía comezar con normalidade nos centros educativos da localidade. Deste xeito, teríase evitado que o alumnado da EEI de Romariz quedase sen clases.

Por outra banda, o BNG de Soutomaior denuncia a existencia de refugallos e de material escolar nas proximidades do centro. Neste sentido, solicítalle ao Goberno Municipal do PP que inicie os trámites para recoller os escombros que permanecen arestora nos arredores do centro.

O BNG leva o caso ao Parlamento

A deputada e portavoz de Educación do BNG no Parlamento de Galiza, Carme Adán, rexistrou unha pregunta na que lle pide á Xunta de Galiza explicacións polo atraso do curso na EEI de Romariz, por non ter informado os pais e nais e por non ter contratado con anterioridade un substituto ou substituta que cubra a baixa por maternidade da mestra titular. “Queremos coñecer se a falta dun mestre ou mestra na EEI de Romariz se debe a un recorte orzamentario da Consellaría de Educación”, apunta Carme Adán.

A parlamentar nacionalista asegura que o de Soutomaior é un exemplo dos centos de casos que se están a dar en toda Galiza pola “desastrosa xestión” da Consellaría de Educación dirixida por Xesús Vázquez.