A XUNTA ESQUECE A SOUTOMAIOR NOS ORZAMENTOS PARA O 2011

Os BNG de Soutomaior impulsa varias emendas aos orzamentos.

O BNG de Soutomaior promove, a través do seu Grupo Parlamentar, varias emendas aos orzamentos para o ano 2011 referentes ao noso Concello nas áreas de Educación, Sanidade, Turismo e Urbanismo; coa intención de que a Xunta do Partido Popular teña en conta ao noso Concello.

Fernando Herrero, Portavoz Municipal nacionalista, lamenta que “unha vez máis se deixe de lado o noso Concello nos Orzamentos para o próximo ano. Os 70.000 euros -1.000 menos que os asignados á remodelación da pista de pádel- son unha cantidade ridícula para axilizar a construción do Instituto xa comprometido pola anterior Xunta e para a que xa hai terreos asignados. Ademais, négase igualmente á reforma dos insalubres baños e da carpintería exterior do edificio de Primaria do CPI de Arcade, solicitada tamén á Delegación de Educación dende hai varios anos”.

Outra das emendas presentadas é a conversión do Centro de Saúde de Arcade nun PAC (Punto de Atención Continuada). “Esta é unha demanda que xa foi secundada con máis de mil sinaturas recollidas entre os habitantes de Soutomaior no ano 2008 polo BNG, pero semella que a educación e a saúde dos nosos veciños non son prioritarias para o Unipartito da Xunta”, apunta Herrero.

Solicitamos tamén unha partida dende a área de Turismo para a recuperación ambiental e integral do sistema fluvial do termo municipal – ríos Verduxo, Oitavén e Pequeno- e a creación dun paseo polo Verduxo, medida esta que axudaría ademais, á xeración de emprego nestes tempos de crise.

Por último, dende o BNG de Soutomaior, e co gallo de poñer fin ao caos urbanístico no Concello, tamén se reclamaba unha subvención para sacar adiante un PXOM que leva 13 anos en tramitacións, que agardamos sexa tida en conta polo Goberno galego.

O BNG DENUNCIA AS PRECARIAS CONDICIÓNS EDUCATIVAS NO COLEXIO PÚBLICO DE ARCADE

A requirimento do BNG de Soutomaior, as deputadas Carme Adán e Teresa Táboas, representantes do BNG no Parlamento de Galiza, veñen de denunciar ante dita institución tanto os problemas de conservación como as graves eivas funcionais que presenta o CPI Manuel Padín Truiteiro de Arcade.

A complexa tipoloxía edificatoria que presenta o centro, con tres edificios independentes, e tendo en conta que o de Infantil se atopa separado dos de Primaria e Secundaria a unha distancia duns 500 metros, dificulta tanto o traballo do profesorado, coma o correcto aproveitamento educativo por parte do alumnado. As instalacións de Secundaria son insuficientes, o que obriga ano tras ano a habilitar aulas de xeito moi precario e en locais pouco apropiados no edificio de Primaria. O deterioro da carpintería exterior deste edificio é ostensible e o estado dos cuartos de baño, deplorable e insalubre. Ademais, o alto número de alumnado co que conta implica tamén unha importante proporción de rapaces con necesidades educativas especiais o que, unido á igualmente alta porcentaxe de alumnado inmigrante, con requirimentos específicos para a súa adecuada integración, esixiría indiscutiblemente unha maior dotación en recursos humanos.

Por todo isto, o BNG demandou ante o Parlamento de Galiza que se dote ao CPI de Arcade dunha orientadora a tempo completo –xa que nestes momentos se está a compartir con outros dous centros públicos-, así como dun especialista máis en pedagoxía terapéutica e dun/ha coidador/a, como xa contan as parroquias veciñas de Vilaboa e Pontesampaio cunha matrícula, nos seus respectivos centros de ensino, moi inferior á do CPI de Arcade. Así mesmo, solicitouse o arranxo dos cuartos de baño e da carpintería exterior do edificio de Primaria. Por último, no escrito presentado no rexistro xeral do Parlamento, as deputadas do BNG tamén sinalan que lles parece insuficiente a partida de 70.000 € contemplada nos orzamentos para o 2011 para a construción do novo IES de Soutomaior.

O BNG espera unha rápida resposta a todas estas queixas, xa que se trata dun tema tan sensíbel como é a educación dos nosos fillos e fillas, mais moito nos tememos que a falta de sensibilidade da Xunta do Partido Popular co ensino público persiga precisamente ralentizar un proxecto tan importante para o conxunto da nosa poboación.

Dende o BNG de Soutomaior esiximos a demostración inequívoca dun maior esforzo, tanto por parte do Goberno Local coma por parte da Xunta de Galicia, se de verdade se quere axilizar o proxecto de construción dun novo Instituto no noso Concello.

UNHA NOVA TAXA GRAVARÁ ÁS EMPRESAS SUBMINISTRADORAS DE TELEFONÍA MÓBIL EN SOUTOMAIOR

O Partido Popular de Soutomaior asume por fin esta proposta do BNG do ano 2007

No Pleno extraordinario do venres 5 de novembro, o goberno do Partido Popular do concello de Soutomaior aprobou, co voto favorábel do BNG, unha taxa que gravará ás empresas subministradoras de telefonía móbil, coa que o concello espera recadar máis de 40.000 € ao ano.

Dende o BNG congratulámonos da adopción desta medida que xa foi proposta no ano 2007 polo noso grupo. “O que pretendiamos ao suxerir a creación deste imposto era unha conxelación das taxas do lixo, subministro de auga e de servizo de velatorio para o 2008; pero o Partido Popular preferiu subir estas taxas aos veciños antes de gravar ás potentadas empresas de telefonía móbil”, afirma o portavoz dos nacionalistas no concello de Soutomaior. “Neste tempo deixáronse de recadar máis de 120.000 € por non levar a cabo unha medida que xa leva anos aplicándose noutros concellos”.

Finalmente, tres anos despois, e obrigados pola crise económica creada pola especulación do capital, o Partido Popular vese na obriga de botar man das propostas do nacionalistas para maquillar os orzamentos do concello para o 2011. “O único que lamentamos é que, e novamente en contra da opinión do BNG, se volvan subir este ano as taxas da auga, lixo e servizo de velatorio, tendo en conta os graves apuros económicos polos que están a pasar moitos veciños de Soutomaior nestes momentos”, sinala Fernando Herrero.

O BNG RECLAMA UN PXOM PARA O CONCELLO DE SOUTOMAIOR

O grupo nacionalista vota contra a modificación das normas subsidiarias porque perpetúan o caos urbanístico do concello

O portavoz municipal do BNG, Fernando Herrero, lamenta que o goberno municipal do Partido Popular “se empeñe en perpetuar a situación de caos urbanístico do noso concello cunha nova modificación dunhas normas subsidiarias obsoletas que datan do ano 1989, cando o que realmente precisamos é un verdadeiro Plan Urbanístico. Esta é a única maneira de preservar o interese público, os nosos recursos naturais e o noso futuro económico”.

O BNG, que votou contra esta nova modificación das normas subsidiarias no último Pleno, denuncia que, se ben non se varia o volume de edificabilidade, si que cambia as condicións de edificabilidade –entre outras, as terrazas que antes tiñan que ser interiores e cunhas características determinadas, agora non se verán limitadas- o que vai redundar nunha inseguridade xurídica urbanística que xa ten levado ao noso concello diante dos tribunais con resultados nefastos para as arcas municipais.

“Dende o BNG levamos anos loitando por sacar adiante un Plan Urbanístico que poña fin ás continuas demandas que están obrigando ao concello a un gasto innecesario en servizos xurídicos que é soportado a costa dos impostos que pagamos todos os veciños; e esta última modificación significa insistir neste sangría de denuncias. O que precisa Soutomaior é impulsar dunha vez por todas un proceso transparente e participativo no que se busque o maior consenso posíbel; un Plan Xeral que amplíe os núcleos rurais ao máximo para permitir a construción de vivendas unifamiliares, que dote as dúas parroquias de zonas verdes, que permita a consecución de solo industrial, etc.; e esta nova modificación das normas subsidiarias é un paso atrás neste sentido, e unha mostra máis da incapacidade do goberno municipal do Partido Popular, que en 15 anos de goberno foi incapaz de sacar adiante un verdadeiro proxecto urbanístico”.

En marcha co BNG

O VAL DO RÍO ULLÓ

Data: Domingo 7 de novembro

Hora: 10 h.

Saída: Cimeterio de Ponte Sampaio

En caso de chuvia

________

o roteiro suspenderase

Dificultade: Baixa

Distancia a percorrer: 8 quilómetros

Tempo a empregar: 3 horas

LUGARES DE INTERESE:

• Ponte xacobea
• Última erosión do río.
• Monte do Castro
• Cama de Santo Estevo.
• Igrexa da Canicouva.
• Muiño do Vilar.
• Murallón.
• Casa da Moura.

Retomamos as rutas ao longo do concello

“En marcha co BNG” abre este domingo as xornadas de sendeirismo previstas para este outono cun percorrido de 7 quilómetros dunha dificultade media-baixa que nos levará aproximadamente 2 horas e media.

Partindo da Casa do Pobo do Val-Sobral ás 10:00 da mañá, seguimos tentando dar a coñecer os espazos naturais do noso concello e o noso rico patrimonio cultural e histórico. Nesta ocasión o percorrido circular levaranos a coñecer a Carballeira do Val, a Ponte Vella sobre o Oitavén, a vexetación da ribeira polo río arriba, o muíño grande, un territorio de lontras, o muíño na pena, a Illa do Oitavén, os prados e os casais de Aranza e a panorámica do val do río Pequeno; entre outros lugares de interese.

Lembramos que en caso de chuvia o roteiro suspenderase.

O Pleno do Concello de Soutomaior reclama a modificación da nova Lei de Augas

Asume o texto da proposta presentada polo BNG, que xa viña denunciando a brutal suba de impostos que recolle o proxecto de lei da Xunta de Galiza

A rolda informativa organizada polo BNG ao longo dos barrios de Soutomaior e en Arcade para informar a cidadanía da desproporcionada suba de impostos que comporta o proxecto de Lei de Augas do PP deu os seus froitos. E é que o Pleno do Concello de Soutomaior, celebrado o xoves 29 de xullo, acordou reclamarlle á Xunta de Galiza, co apoio do PP local, a modificación desta norma coa que o Goberno de Alberto Núñez Feijóo tenta incrementar de xeito brutal a imposición sobre o uso ou consumo da auga.

O BNG de Soutomaior congratúlase da decisión do Pleno, que asumiu o texto dos nacionalistas. O portavoz municipal do Bloque, Fernando Herrero, lembra que se trata dunha norma “elaborada de costas aos concellos e a súa elaboración ten que ser sometida a consulta pública”. Os nacionalistas reclaman garantir o acceso ao ciclo completo da auga a todos os cidadáns e cidadás de Galiza en igualdade de condicións e garantir unha fiscalidade progresiva para a auga que de ningún xeito supoña un incremento da carga impositiva na situación actual de crise pola vía dos impostos indirectos.

A nova Lei de Augas –que se atopa en trámite parlamentar– suprime as exencións existentes na actualidade para os núcleos de menos de 2.000 habitantes. Esta medida prexudica especialmente os veciños e veciñas do rural, que terán que pagar o canon polo aproveitamento da auga dos seus propios pozos, ou de traídas veciñais –aínda que non teñan servizos públicos de abastecemento de auga ou de saneamento. Esta lei obriga ademais a instalar contadores homologados nos pozos particulares, baixo a ameaza de multas de até 30.000 euros ou que se lle aplique un consumo estimativo. Neste senso, o portavoz municipal do BNG denuncia que se trata “dunha política fiscal abusiva que queren aplicarlle a toda a poboación co único obxectivo de recadar.

Como exemplo, unha persoa que viva soa e que teña un consumo medio duns 3 metros cúbicos ao mes, verá como a carga tributaria do seu recibo da auga aumenta en máis dun 363%; e unha familia de tres membros, con ese mesmo consumo por persoa, terá que soportar un incremento do 171%.

Por último, o BNG sinala que con esta lei o PP reduce os consumos asimilábeis a domésticos, pasando dos 3.000 metros cúbicos ao ano actuais a 2.000 metros cúbicos ao ano, o que terá consecuencias moi importantes na suba que van experimentar colexios, centros de saúde, pequenos negocios ou na hostalaría, entre outros.

O BNG de Soutomaior denuncia cunha moción a brutal suba de impostos que implica a nova Lei de Augas

Pide retirar o proxecto de lei ante os incrementos que supón na factura para o uso doméstico, que poderán chegar até o 363%

Despois da rolda informativa organizada polo BNG ao longo dos barrios de Soutomaior e en Arcade para informar a cidadanía da suba de impostos brutal que comporta o proxecto de Lei de Augas do PP, os nacionalistas presentan unha moción –que se debaterá no Pleno deste xoves, 29 de xullo– na que reclaman a retirada desta norma. E é que con esta lei, o PP incrementa de xeito desproporcionado a imposición sobre o uso ou consumo da auga.

Como exemplo, unha persoa que viva soa e que teña un consumo medio duns 3 metros cúbicos ao mes, verá como a carga tributaria do seu recibo da auga aumenta en máis dun 363%; e unha familia de tres membros, con ese mesmo consumo por persoa, terá que soportar un incremento do 171%.

Ademais, con esta lei o PP reduce os consumos asimilábeis a domésticos, pasando dos 3.000 metros cúbicos ao ano actuais a 2.000 metros cúbicos ao ano, o que terá consecuencias moi importantes na suba que van experimentar colexios, centros de saúde, pequenos negocios, hostalaría...

Pagar polos pozos privados

A nova Lei de Augas –que se atopa en trámite parlamentar– suprime as exencións existentes na actualidade para os núcleos de menos de 2.000 habitantes. Esta medida prexudica especialmente os veciños e veciñas do rural, que terán que pagar o canon polo aproveitamento da auga dos seus propios pozos, ou de traídas veciñais –aínda que non teñan servizos públicos de abastecemento de auga ou de saneamento. Esta lei obriga ademais a instalar contadores homologados nos pozos particulares, baixo a ameaza de multas de até 30.000 euros.

Por outra parte, o BNG denuncia que a lei non adopta ningunha medida que veña a incentivar o aforro de auga e “para máis estabelece unha cota para todos os fogares aínda que non teñan consumo de auga”, sinala o portavoz do BNG en Soutomaior, Fernando Herrero. “Trátase dunha política fiscal abusiva que queren aplicarlle a toda a poboación co único obxectivo de recadar”, engade Herrero.

Propostas do BNG

O BNG denuncia que se trata dunha norma elaborada de costas aos concellos. De aí que solicite a súa retirada e a elaboración dun novo proxecto de lei que se someta a consulta pública. Ademais, os nacionalistas propóñenlle ao Pleno da Corporación o cumprimento da Directiva Marco da Auga e inclusión de todos os seus preceptos, garantir o acceso ao ciclo completo da auga a todos os cidadáns e cidadás de Galiza en igualdade de condicións e garantir unha fiscalidade progresiva para a auga en Galiza que de ningún xeito supoña un incremento da carga impositiva na situación actual de crise pola vía dos impostos indirectos.

Ademais, o BNG reclama a regulación e ordenación dos usos da auga que recolla todas as peculiaridades do territorio galego e do acceso á auga, de xeito que se garanta que a auga sexa un servizo universal das galegas e dos galegos. Por último, solicita na moción que se teña en conta unha regulación dos usos industriais da auga que garanta o uso sostíbel do recurso e unha xestión transparente do canón industrial do uso da auga.

O BNG de Soutomaior celebra a III Festa Nacionalista

Terá lugar este venres, 16 de xullo, a partir das 22h00 no Peirao de Arcade

O BNG de Soutomaior celebra a III Festa Nacionalista na Carballeira do Peirao de Arcade o vindeiro venres 16 de xullo. No acto, que dará comezo a partir das 22.00 horas, intervirán Fernando Herrero, portavoz municipal do BNG, Iria Aboi, secretaria xeral de Galiza Nova, e Teresa Táboas, coordinadora da Executiva do BNG e deputada no Parlamento de Galiza. Por terceiro ano consecutivo, os nacionalistas convidan as cidadás e cidadáns a participar neste acto festivo-musical que contará coas actuacións dos grupos “Contrabalde”, “O Leo i Arremecághona”, “Chámalle como queiras” e “DJ Da Terra”. Como en cada edición, haberá postos de comida e bebida a prezos populares.

Esta festa celébrase dentro dos actos previos que o BNG organiza por todo o país con motivo do Día da Patria Galega, que terá como acto central a xa tradicional manifestación do 25 de Xullo polas rúas de Compostela. “Fai valer a túa forza!” é o lema sobre o que xira a campaña do 2010 e co que se chama á defensa do autogoberno de Galiza, actualmente en grave risco, e á defensa dunha economía ao servizo dos galegos e galegas. O BNG quere amosar o rexeitamento da cidadanía ás políticas postas en marcha polo PSOE e polo PP nos Executivos do Estado e Galiza, respectivamente, unhas políticas ao servizo dos intereses privados, da banca e da economía especulativa. Co lema deste ano, o BNG tamén insta a sociedade galega a que faga valer a súa forza individual e colectiva como pobo para reclamar un Estatuto de Nación.

A Xunta acomete unha brutal subida de impostos coa nova Lei de auga

O PP quere cobrarlle aos veciños polas súas traídas e pozos particulares

O Partido Popular está a preparar unha brutal, desproporcionada e inxusta subida de impostos coa modificación da Lei de Augas que pretende facer. O Consello da Xunta aprobou o pasado 27 de maio o proxecto da nova Lei de Augas, que neste momento está a debate no Parlamento galego.

Este Proxecto de Lei ten como único obxectivo aumentar a capacidade recadatoria da Xunta, facéndonos pagar a todos os veciños e veciñas un imposto sobre a auga.

Esta suba de impostos que o PP introduce coa nova lei de augas, vai supoñer multiplicar por tres o actual canon para todos os usuarios que teñan abastecemento e saneamento público, pasando dos 100 euros ao ano para vivendas de catro persoas.

O canon da auga gravará por igual o consumo ou utilización da auga procedente de captacións propias (traídas veciñais ou pozos) e a procedente do abastecemento municipal. Só no caso de que os usuarios non dispoñan nin de abastacemento público nin de rede de saneamento pública poderán aplicar unha redución da cota do 80%. Agora ben onde haxa ou cando haxa saneamento terán que pagar a cota íntegra.

Os titulares das captacións propias estarán obrigados a instalar contadores homologados, de non facelo no prazo de seis meses o canon da auga liquidaraselle polo método de estimación obxectiva (en función da concesión de auga que se teña ou do consumo medio dunha vivenda) e poderán ser sancionados con multas de ata 30.000€. Os titulares das traídas colectivas son responsabeis solidarios do pago do canon por parte dos usuarios.

Todos os usuarios de auga van ter que pagar estes novos impostos, xa que se suprimen as exencións que actualmente están vixentes, que beneciaban ao medio rural. Así:

• No novo canon da auga non se exclúe de pagar o imposto a ningún núcleo rural, nin aos de menos de 2.000 habitantes exentos do canon de saneamento na actualidade, nen tan sequera os de 500 habitantes que excluía a lei de 1993.

• Tampouco se exclúen do pago do imposto os núcleos rurais que non teñan rede de saneamento, mentres este non entre en funcionamento.

Herrero insta a Reguera a que demostre o “bo funcionamento” da EDAR de Arcade

“Que faga como cando inauguraron a depuradora, que o conselleiro dixo entón que se podía beber auga do emisario”

O portavoz do BNG de Soutomaior, Fernando Herrero, convida o alcalde Agustón Reguera a que demostre o “bo funcionamento” da depuradora de Arcade, despois de que o popular eludise a súa ineficacia e irresponsabilidade “botándolle a culpa aos que nos preocupamos pola veciñanza.

Herrero lembra que en ningún caso o BNG nomeou a zona cualificada como categoría C, algo que si fixo Reguera, “quen asegurou que esta área non lle afecta ás mariscadoras e mariscadores de Arcade, o cal evidencia que non sabe onde faenan”, sinala o nacionalista. “Nós corroboramos que lle afectaban a máis mariscadores de concellos que traballan nesa zona e démolo a coñecer para que se tomen as medidas oportunas”, engade o portavoz.

Nesta liña, o BNG esixe que se adopten liñas de acción concretas para sanear o fondo da ría de Vigo. Ademais, culpa as administracións tanto local como autonómica do estado de “desidia” e do “abandono de funcións” á hora de terminar con esta lacra que extermina un sector produtivo vital para Galiza e que o BNG sempre defendeu. Para evitar que aumenten as zonas C, o portavoz municipal reclama actuacións urxentes con prazos e orzamento. Tamén pide que se corrixan os vertidos que saen directamente aos ao río e á ría sen pasar pola depuradora.

Por último, ante as acusacións de Reguera, Herrero advirte de que é a Xunta de Galiza e en ningún caso o BNG quen delimita as zonas.

O BNG de Soutomaior pecha o ciclo de rutas até o outono

O domingo “En marcha co BNG” percorrerá os “Sendeiros das Ermidas” a partir das 10h30

O BNG de Soutomaior pecha este domingo 20 de xuño o programa de sendeirismo creado para dar a coñecer os espazos naturais do concello. A ruta circular “Sendeiros das Ermidas”, que partirá ás 10h30 do Chan de Salgueirón, ponlle punto final a “En marcha co BNG” até o outono. Nesta andaina –de dificultade media e duns 10 km– visitaremos o Monte do Ouro, Bochaín, Alto dos Pereiros, A Feixoeira (onde se atopan os límites do concello), O Alto do Viso, A Peneda (como formación granítica, o castro prerrománico, a fortaleza arcebispal, a ermida e as vistas sobre a ría), O Viso, Alxán de Arriba, Capela de San Caetano, Castelo (e as especies do seu bosque), O Toural, O monte de Pozo Vello, A Golbada, A Escorregadoira, e, de novo, Salgueirón.

Para despedirmos as rutas, desta vez comeremos polo camiño. O xantar será no recinto de San Caetano ao redor das 14h30. Ademais da comida, suxerimos que os participantes leven roupa axeitada –pantalóns longos e camisola de manga longa–, botas ou zapatillas de camiñar, gorro ou viseira e un caxato ou pau.

A finalidade de “En marcha co BNG” pasa por dar a coñecer o patrimonio cultural, histórico e natural de Arcade e de Soutomaior a través dos vieiros históricos que ao longo dos anos vertebraron a vida tradicional do concello.

A contaminación da EDAR de Arcade impide o marisqueo a pé

A pasividade da Xunta e do Concello de Soutomaior afecta gravemente ao principal sector económico e xerador de emprego

Esta mañá en rolda de prensa, o portavoz de Pesca do Grupo Parlamentar do BNG, Bieito Lobeira, o portavoz municipal do BNG en Soutomaior, Fernando Herrero, a responsábel comarcal do BNG en Pontevedra, Anxos Riveiro e mais a Asociación de Naseiros reiteraron as súas denuncias a respecto do sistema de depuración elixido para os concellos do fondo da enseada da Ría de Vigo.

Cando se instalaron as depuradoras (EDAR de Arcade e de Comboa), o BNG xa expresou a súa preocupación polo tipo de instalación escollida –que non se adaptaba a unha rede de sumidoiros que carece de separativa de augas pluviais e fecais–, as súas situacións –nas proximidades de importantes bancos marisqueiros e das zonas de baño máis frecuentadas–, por non recoller todos os vertidos que se fan ao río e á ría e por ter unhas condicións de funcionamento inasumíbeis –ao recoller expresamente que en determinados casos poden realizar verteduras sen ningún tipo de depuración.

O Goberno municipal do PP e a Xunta de Galiza, en resposta a iniciativas presentados polo BNG, tanto no Concello como no Parlamento galego, menten ao afirmar que a depuradora funciona correctamente, e que as obras realizadas subsanaron todas as deficiencias.

A realidade é ben distinta, e a Xunta vén de declarar unha das zonas de marisqueo como zona C, por coliformes e augas fecais. Esta catalogación prohibe o marisqueo, co que afecta gravemente ao emprego e á actividade económica.

O BNG cualifica de irresponsábel a actitude das institucións competentes (Concello de Soutomaior e Xunta de Galiza), xa que as verteduras afectan ao principal sector económico desta ampla zona que abarca os concellos de Vilaboa, Soutomaior, Redondela, Moaña, Cangas e a parroquia pontevedresa de Ponte Sampaio. Neste momento, só en Arcade, hai 230 persoas que viven de forma directa do marisqueo.

Lobeira e Herrero lembraron que o BNG vai seguir defendendo unha alternativa a esta situación, demandando da Xunta de Galiza e do Concello de Soutomaior orzamentos suficientes e calendario concreto para o saneamento integral do fondo da ría de Vigo.

O BNG de Soutomaior explica as alternativas para unha saída xusta á crise

Organiza a charla “Alternativas á crise” o vindeiro mércores 16 de xuño ás 21h00 na Casa da Cultura de Arcade

O mércores 16 de xuño, a partir das 21h00, o BNG de Soutomaior celebra un acto no que dará conta das alternativas que propón o nacionalismo para acadar unha saída xusta á crise máis alá do tesoirazo de Zapatero e das políticas neoliberais do PP e do PSOE. O portavoz municipal do BNG en Soutomaior, Fernando Herrero, e o responsábel da CIG, Duarte Correa, explicaranlle á veciñanza as principais liñas nas que se fundan as propostas nacionalistas. O BNG e a CIG rexeitan de pleno as medidas anunciadas polo Goberno español –redución do salario dos funcionarios, conxelación das pensións, eliminación dos dereitos dos dependentes ou o recorte no investimento en infraestruturas–, xa que só recortan os dereitos das clases traballadoras sen atacar a raíz do problema. Tamén censuran o decreto-lei de reforma laboral impulsado polo Executivo de Zapatero, no que posibelmente se indemnizará con 20 días os despedimentos en empresas que teñan perdas durante máis dun semestre e no que se recolle unha indemnización por despedimento de 33 días en lugar dos 45 dos actuais empregos indefinidos.

Neste contexto, os nacionalistas apostan por unha saída á crise buscando un modelo económico diferente, baseado na economía produtiva e non especulativa, un modelo autocentrado no que os territorios teñan capacidade de producir con dereitos laborais e sociais garantidos. Ante a incapacidade do Goberno español para elaborar a folla de ruta coa que saír da crise, o BNG defende combater o paro con políticas económicas de fondo, co estabelecemento de políticas estruturais que deberan ser obriga dos gobernos.

As propostas das que o BNG parte baséanse en aspectos esquecidos polos poderes estatais, como a loita contra ese 25% do PIB non que se calcula ou fraude fiscal imperante no Estado, a necesidade de gravar rixidamente figuras coma as sociedades de investimento colectivo, a reforma da política fiscal para gravar as grandes fortunas ou a racionalización do gasto público –coa redución da administración periférica do Estado (eliminación das Deputacións) e o gasto militar (retirada das tropas de Afganistán).

O BNG presenta, como medida de loita contra a crise, unha proposta para a creación de máis obradoiros de emprego que é rexeitada polo Partido Popular.

Tamén vota en contra da recuperación dos muíños, da mellora dos sumidoiros e de ratificar o acordo do Plan Xeral da Lingua Galega

No derradeiro Pleno municipal, o PP rexeitou unha moción do BNG na que os nacionalistas reclamaban novos obradoiros de emprego, ademais do de cociña. “En épocas de crise, cómpre incentivar o traballo nas localidades”, sinala Fernando Herrero, portavoz municipal do BNG. E é que os populares xustificaron coa actual situación económica os votos en contra a unha iniciativa que axudaría a dinamizar o emprego no Concello de Soutomaior.

Igual sorte correu a moción do BNG a prol do plan de recuperación dos muíños, que moitos deles fican agochados polas silveiras. Os nacionalistas entenden que debe ser a Corporación Municipal quen actúe para conservar as tradicións do concello. O Grupo do PP anunciou no debate do Pleno que unha empresa privada contratada por Augas de Galiza (Consellaría de Medio Ambiente) vai facer un estudo do patrimonio etnográfico. “Con tal motivo ten máis lóxica preparar un plan de recuperación dos muíños”, subliña Herrero.

A moción do BNG para arranxar os problemas que causa a estación de bombeo dos sumidoiros da Cagazó tamén contou cos votos en contra do PP. “Parte destes problemas arranxaríanse colocando un tubo ao nivel do río no espazo destinado ao paseo entre as pontes. Aproveitando as obras que se están desenvolvendo nesa zona polo AVE, consideramos o momento oportuno para a colocación deste tubo de recollida dende a estación de bombeo até o tubo que vai dende praia Matilde até a depuradora”, explica Herrero. O portavoz municipal do BNG defende que se trataría dunha obra “de futuro”, “xa que se eliminarían os verquidos incontrolados”.

Tamén recibiu o rexeitamento do PP a moción do BNG na que os nacionalistas instaban a recuperar o consenso do Plan Xeral de Normalización da Lingua Galega (PXNL), aprobado no Parlamento de Galiza por unanimidade no 2004 e cuxo contido está a ser incumprido pola actual Xunta de Alberte Núñez Feixóo. O PP tamén votou en contra do apoio do Concello de Soutomaior en defensa da Iniciativa Lexislativa Popular (ILP) que, promovida pola plataforma cidadá Queremos Galego, busca garantir os dereitos lingüísticos dos galegos.

Aprobada a habilitación das zonas de baño

No pasado Pleno, os tres grupos aprobaron por unanimidade a moción do BNG na que se solicita a habilitación das zonas de baño do concello. Tamén se acordou promulgar un bando con estas actuacións, así como o resultado da catalogación das zonas de baño. O BNG lembra que o Concello de Soutomaior oferta na súa páxina web dúas zonas de baño marítimas e cinco continentais.

Fernando Herrero, portavoz municipal do BNG, urxe a que se controle a habilitación destas áreas, sobre todo, tendo en conta que no pasado mes se denunciaron novas verteduras na EDAR de Arcade (Soutomaior), caso que foi levado ao Parlamento de Galiza polo BNG a través dos deputados Bieito Lobeira e Teresa Táboas.

En marcha co BNG

O VAL DO RÍO ULLÓ

Data: Domingo 7 de novembro

Hora: 10 h.

Saída: Cimeterio de Ponte Sampaio

En caso de chuvia

________

o roteiro suspenderase

Dificultade: Baixa
Distancia a percorrer: 8 quilómetros

Tempo a empregar: 3 horas

LUGARES DE INTERESE:

• Ponte xacobea
• Última erosión do río.
• Monte do Castro
• Cama de Santo Estevo.
• Igrexa da Canicouva.
• Muiño do Vilar.
• Murallón.
• Casa da Moura.
  

O BNG insta o Concello de Soutomaior a elaborar un plan de recuperación dos muíños

O Grupo Municipal do BNG de Soutomaior vén de presentar para o seu debate e aprobación no vindeiro Pleno unha moción na que insta o Concello a elaborar un plan de recuperación dos muíños. O BNG entende que é deber da Corporación e do Goberno de Soutomaior a conservación das tradicións e do patrimonio do noso termo municipal.

Os nacionalistas lembran que nas parroquias do Concello de Soutomaior fican unha serie de muíños de auga que constitúen unha gran riqueza patrimonial e que son de grande interese para seren expostos como modelo duns tempos nos que se erixían como pezas fundamentais tanto da economía como da vida da veciñanza. Porén, o estado que presentan a meirande parte deles é totalmente ruinoso. Mesmo algúns dos muíños se atopan agochados baixo matos de silveiras e hedras.

Ante esta situación, o Grupo Municipal do BNG de Soutomaior insta o Concello a aprobar un plan de recuperación de muíños de auga coa posta en funcionamento dos mesmos. Para levar a cabo este plan, o BNG apunta que se realizarán as xestións e actuacións que sexan oportunas.

O BNG solicita a habilitación das zonas de baño do Concello de Soutomaior

Ante a proximidade da temporada de baño, o Grupo Municipal do BNG de Soutomaior vén de presentar unha moción para debater no próximo Pleno na que solicita a habilitación das zonas de baño do concello. Tamén reclama que se promulgue un bando con estas actuacións, así como o resultado da catalogación das zonas de baño.

Cómpre destacar que a Dirección Xeral de Saúde Pública supervisa, previa solicitude das corporacións municipais, as zonas de baño, facendo comprobacións da calidade microbiolóxica das augas. No caso de Soutomaior, o Concello oferta na súa páxina web dúas zonas de baño marítimas e cinco continentais.

Fernando Herrero, portavoz municipal do BNG, urxe a que se controle a habilitación destas áreas, sobre todo, tendo en conta que no pasado mes se denunciaron novas verteduras na EDAR de Arcade (Soutomaior), caso que foi levado ao Parlamento de Galiza polo BNG a través dos deputados Bieito Lobeira e Teresa Táboas. Herrero tamén lembra que durante o pasado verán, os habitantes de Soutomaior sufriron as consecuencias do verquido de gran magnitude da EDAR de Pontecaldelas. Daquela, algúns bañistas mesmo tiveron que acudir aos centros de saúde, tal e como recomendara o Seprona.

O BNG de Soutomaior gaña unha nova batalla co Plan de Ordenación do Litoral

A Xunta de Portavoces do Concello de Soutomaior vén de recoñecer as reclamacións dos nacionalistas sobre o POL

O BNG de Soutomaior congratúlase de que a Xunta de Portavoces veña de asumir a meirande parte das súas reclamacións sobre o Plan de Ordenación do Litoral (POL). Os tres grupos políticos acordaron por unanimidade enviarlle á Xunta de Galiza as suxestións, que principalmente pasan por eliminar as indefinicións do POL e por suprimir a protección esaxerada, peticións que xa formulará o BNG.

“Hai un mes, o PP chamounos alarmistas e agora recollen todas as nosas reclamacións sobre o POL”, subliña o portavoz dos nacionalistas en Soutomaior, Fernando Herrero. E é que a Xunta de Portavoces dos Grupos Políticos do Concello acordaron por unanimidade enviarlle ao Goberno galego unhas suxestións nas que se solicita en gran parte o reclamado anteriormente polo BNG.

No documento que se lle achega á Consellaría de Medio Ambiente, Territorio e Infraestruturas, os tres grupos sinalan que “se descoñece o alcance das implicacións de cada cualificación: no texto normativo non aclara nada”. Seguindo a liña do censurado polos nacionalistas, a Xunta de Portavoces tamén reclama “maior claridade e precisión nas determinacións que recolle” o POL.

Ademais e como censurara o BNG, os tres grupos políticos critican que o proposto no plan “non está axustado ao territorio existente, xa transformado”. Outra das suxestións recollidas polos grupos é a “definición dun réxime transitorio de aplicación” e a “revisión do modelo virtual utilizado para a análise da protección, sobre todo as do corredor”.

Suxestións específicas

Entre as propostas específicas recollidas na Xunta de Portavoces cómpre destacar que o POL non sexa aplicado “no solo urbano, nas unidades de actuacións aquí delimitadas sexa cal sexa o estado de tramitación do instrumento de xestión e no solo de núcleo rural, tal e como estea delimitado”.

Os tres grupos políticos con representación no Concello de Soutomaior tamén instan a Xunta a que elimine “a protección de mellora ambiental e paisaxística na área comprendida entre o novo corredor do AVE e a estrada N-550, permitindo a ordenación da área.

Ademais, propóñenlle ao Goberno galego “reducir as propostas de protección de corredores ecolóxicos atendendo á topografía, ao parcelario e demais fitos existentes no territorio” nos casos da Fonte da Ribeira-Verdellóns, na Porta Regueira, no Daión-Sucadiña, na Subida a Cochón, en Salgueirón e no Peirao. Neste último, o documento acordado subliña que a protección “carece de entidade, xa que o territorio está formado mediante recheos”.

No que se refire á protección costeira, a Xunta de Portavoces sinala que “en xeral, este tipo de protección se axusta á lexislación sectorial en materia de costas, é dicir, ao deslinde marítimo-terrestre e á protección de costas que define”.

O BNG leva ao Parlamento o deficiente funcionamento da depuradora

As reiteradas verteduras prexudican a pesca e o marisqueo

Os deputados do BNG Bieito Lobeira e Teresa Táboas veñen de presentar unha pregunta no Parlamento de Galiza para a súa resposta escrita sobre o deficiente funcionamento da Estación Depuradora de Augas Residuais (EDAR) de Arcade e sobre o seu impacto na pesca e no marisqueo. E é que as reiteradas verteduras están a prexudicar a actividade produtiva na enseada de San Simón.

Colectivos profesionais como a Asociación de Naseiros “Alvedosa” teñen denunciado repetidas veces este tipo de episodios contaminantes. “Os traballadores e traballadoras do mar, mariñeiros, mariscadoras a pé e mariscadores a flote non poden ser vítimas da inacción das administracións da que obviamente non son responsábeis”, apuntan os parlamentares.

O BNG sinala como responsábeis do problema tanto o Concello de Soutomaior como a Consellaría de Medio Ambiente, Territorio e Infraestruturas. “Deben dar explicacións sobre o que está a ocorrer e, sobre todo, deben achegar solucións definitivas que eviten no futuro a reprodución de verteduras contaminantes como as que están a ter lugar en Arcade”, afirman os parlamentares.

Lobeira e Táboas instan a Xunta de Galiza a explicar cales son os problemas que presenta a EDAR, de que administración son responsabilidade, que medidas concretas se van adoptar e o prazo de tempo no que serán efectivas. Ademais, pregúntanlle á Consellaría de Medio Ambiente, Territorio e Infraestruturas se é consciente do impacto que o mal funcionamento da EDAR está a provocar sobre os bancos marisqueiros e recursos mariños de Arcade e do fondo da ría de Vigo.

O BNG de Soutomaior tamén levará ao Pleno municipal unha moción nesta liña. Os nacionalistas denunciarán o deficiente funcionamento da EDAR de Arcade e instarán o Concello a tomar as medidas oportunas para pórlles fin ás verteduras.

Queremos Galego recollerá sinaturas a prol da lingua na Festa da Ostra de Arcade

A plataforma Queremos Galego vén de poñer en marcha novas medidas contra a política lingüística da Xunta de Galiza. Entre elas, a recollida de sinaturas en apoio á Iniciativa Lexislativa Popular (ILP) para garantir os dereitos lingüísticos dos galegos. A campaña chega esta fin de semana a Arcade (Soutomaior) co gallo da Festa da Ostra.

A plataforma instalará no Peirao da vila unha mesa informativa na que sumará apoios en defensa do estabelecido na Lei de Normalización Lingüística e no Plan Xeral de Normalización da Lingua Galega, ambas as normas aprobadas por unanimidade no Parlamento de Galiza nos anos 1983 e 2004, respectivamente.

O colectivo, do que forman parte máis de 600 entidades de toda Galiza, pretende demostrar coa ILP o amplo consenso social co que conta a lingua galega fronte ao extremismo e auto-odio que impulsa o Goberno que dirixe Alberto Núñez Feijóo.

Concerto en Pontevedra

Queremos Galego lembra que esta reivindicación tamén contará cunha vertente lúdico-cultural, coa celebración dun macroconcerto para o 17 de abril no recinto feiral de Pontevedra, onde actuarán Ruxe Ruxe, Luar na Lubre, Zurrumalla, Fuxan os Ventos, Os 3 Trebóns, A Quenlla, Fía na Roca, García MC, Galeoz, Lamatumbá, Os Carunchos, Espido, Uxía Senlle, Berrogüeto e Asociación de Gaiteiros Galegos. A entrada anticipada ten un prezo de 10 euros.

O BNG de Soutomaior denuncia que o Plan de Ordenación do Litoral é tremendamente agresivo con Arcade

Aféctalles a equipamentos como o tanatorio ou a depuradora e deixa sen protección o río Verduxo ou a carballeira do Peirao

O BNG de Soutomaior leva ao Pleno que se celebrará este xoves, 25 de marzo, o Plan de Ordenación do Litoral (POL), que se atopa arestora en trámites de consulta nos diferentes concellos. Ademais de criticar o escurantismo co que se está a tratar o plano e a grafía pobre que induce a confusións, os nacionalistas denuncian o silenciamento do Goberno municipal do PP, “o alcalde cala por disciplina de partido, pero o plano é tremendamente agresivo para Arcade”, explica o portavoz municipal do BNG, Fernando Herrero. “Non é certo que protexa o litoral, e menos no caso de Arcade”, advirte.

O BNG lembra que este plano elimina a carballeira do Peirao como zona protexida. Pola contra, equipamentos como a depuradora e o pozo de tormentas son preservados dentro dun espazo ecolóxico. Tamén fica afectado polo POL todo o núcleo urbano –Roxelio Landeiro, a Coutada e parte da rúa Xosé Solla–, o que obrigará os propietarios a catalogar e a presentar perante a Xunta de Galiza calquera tipo de reforma ou construción. “Mesmo o Goberno galego podería ordenar o derribo das vivendas”, explica o portavoz municipal. A protección sobredimensionada abrangue dous regatos, o Daión e o das Devesas. Ademais quedan afectados o cemiterio e o tanatorio, “salvándose de casualidade o Campo Municipal”, advirte Herrero.

Pola contra, o BNG de Soutomaior denuncia que non se protexe nin o Río Verduxo nin un só bosque. “Tal e como está formulado pódese construír enriba da Xunqueira”, sinalan os nacionalistas, que subliñan que as novas construcións do Peirao fican sen ningún tipo de salvagarda. O portavoz municipal do BNG apunta que “en vez de estar pensado para a poboación en xeral, o POL está pensado só para uns poucos”. Herrero engade que “casualmente hai propiedades perfectamente limitadas dentro de zonas de protección paisaxística que quedan sen preservar”.

O BNG insta o Concello a tramitar as alegacións

O BNG, que critica que o POL está deseñado de costas á realidade do país e que xera unha manchea de agravios comparativos, insta a través dunha moción o Concello de Soutomaior a que facilite que os veciños e veciñas poidan presentar suxestións ao POL, comprometéndose a tramitarllas.

Tamén urxe o Concello a que presente, como administración afectada e en defensa do interese xeral da veciñanza, as súas propias alegacións, demandando da Consellaría de Medio Ambiente, Territorio e Infraestruturas a retirada do Plan de Ordenación do Litoral, cuxa aprobación inicial se agarda para o 15 de maio.

O BNG de Soutomaior explica nun acto público as consecuencias do Plano do Litoral

Celébrase mañá xoves, 11 de marzo, na Casa da Cultura Fernando Pereira de Arcade

O xoves, 11 de marzo, a Casa da Cultura Fernando Pereira de Arcade acolle a partir das 20h30 un acto público no que o BNG explicará o Plano de Ordenación do Litoral (POL) que vén de presentar o PP. O portavoz municipal do BNG de Soutomaior, Fernando Herrero, e o responsábel comarcal de Política Local e concelleiro de Urbanismo e Ordenación do Territorio de Pontevedra, César Mosqueira, debullarán nunha charla-coloquio dirixida a toda a cidadanía as repercusións do Plan do Litoral elaborado pola Xunta do PP no concello.

O BNG, que aposta por ordenar e protexer o litoral con criterios que respondan ás necesidades do país, salienta que o POL do PP é absolutamente alleo á realidade de Galiza, mesmo podería considerarse propio do Levante español. Ademais, advirte de que a documentación achegada pola Xunta de Galiza contén erros masivos de proteccións innecesarias e desproteccións inxustificadas.

Na charla-coloquio, Herrero e Mosqueira explicarán as inxustizas do POL no Concello de Soutomaior, xa que desafecta boa parte do que ficaba afectado e, de rebote, afecta boa cantidade de zonas que por atoparse máis alá dos 500 metros non estaban afectadas até o de agora –pasa en zonas dos 4 quilómetros. O BNG lembra de aprobarse o POL, as consecuencias serán enormes e de moi difícil reversión sobre o futuro de moitas áreas do litoral galego.