O BNG DE SOUTOMAIOR ORGANIZA UNHA CHARLA COLOQUIO SOBRE A INCIDENCIA NA RIA DUN TRASVASE DE AUGA DO VERDUGO

A CHARLA CELEBRARASE O VENRES 30 ÁS 20:30 h NA CASA DA CULTURA DE ARCADE

O BNG de Soutomaior informará á veciñanza sobre o forte impacto ecolóxico e medioambiental que suporá á Enseada de San Simón e á Ría de Vigo o trasvase de auga do río Verduxo á presa de Eiras que se está a negociar en silencio e con urxencia entre a Xunta e o Concello de Vigo.

No acto participarán Fernando Herrero (portavoz municipal do BNG en Soutomaior), Serxio Regueira (Presidente da Plataforma pola Defensa da Ría de Vigo), Ana Antelo (licenciada en Ciencias Mariñas e educadora ambiental) e Antón Lois (Responsábel de Comunicación de Amigos da Terra e educadora ambiental). A desaparición de especies como a ameixa fina e o berberecho é unha das ameazas que este trasvase nos traería, ao deixar de aportar o río Verduxo unha cantidade de auga doce necesaria para estes moluscos.

Ante isto, contraporase que se faga unha xestión eficiente da auga por parte do Concello de Vigo, ademais dun arranxo das deficientes conducións da auga, polas que se perden milleiros de litros de auga. Non se pode consentir a dobre moral de quen fai discursos de austeridade ante a crise, e por outra banda, leva a cabo políticas de despilfarro en obras cuxa necesidade é cando menos discutíbel, e indubidabelmente agresiva co noso entorno.

O BNG DE SOUTOMAIOR OPONSE A UN TRANSVASAMENTO PERMANENTE DO RÍO VERDUGO AO EMBALSE DE EIRAS

O portavoz municipal pídelle ao alcalde que medie entre traballadores e empresa na folga de Urbaser pola sinatura do convenio

            Fernando Herrero, portavoz do grupo municipal do BNG en Soutomaior, solicitou unha entrevista co Alcalde de Soutomaior para expoñerlle a rotunda oposición dos nacionalistas a un transvasamento permanente do río Verdugo ao embalse de Eiras que está a solicitar o PSOE dende o Concello de Vigo.

            Os nacionalistas afirman que o transvasamento tería un forte impacto medioambiental, afectando gravemente á fauna da zona e ao marisqueo na ría. Ademais consideran que o Verdugo é un patrimonio de todos, polo que solicitará que o alcalde interveña nas negociacións que definan o seu futuro. Non se pode consentir que decisións que afectan aos nosos veciños e ao noso territorio se tomen bilateralmente entre o Concello de Vigo e a Xunta de Galicia, sen ter en conta aos demais afectados.

            Por outra banda, o Fernando Herrero pediralle ao Alcalde de Soutomaior que interceda na folga do lixo e que inste aos representantes de Urbaser a sentarse a negociar cos traballadores para poder buscar unha saída dialogada que remate cun conflito no que fundamentalmente se están a ver prexudicados traballadores e veciños.