O BNG DE SOUTOMAIOR DEMANDA AO GOBERNO LOCAL DO PP UNHA ACTUACIÓN INMEDIATA NO ENTORNO DO ANTIGO MUSEO XOSE SOLLA

·       PP comprometeuse no último pleno ao correcto acondicionamento das proteccións.

·       Varios cascotes teñen caído xa fora da protección, co conseguinte risco para os viandantes

 Dende o BNG de Soutomaior demandamos ao Goberno do PP unha actuación inmediata no entorno do Antigo Museo Xosé Solla. O estado ruinoso do edificio obrigou ao Concello a acotar a zona polo risco que supón para os viandantes, pero o paso para os peóns carece de balado e a protección entre dito paso e o edificio e demasiado pequena.

O tellado atópase practicamente a altura do balado

O BNG de Soutomaior xa advertimos no último pleno que a protección habilitada se atopaba nun estado lamentábel, coas táboas do paso deformadas polo peso de vehículos que estacionan sobre elas; e con buratos, o que obriga aos transeúntes a andar pola calzada. Ademais, o balado entre o paso e o edificio, está demasiado preto deste, o que ten ocasionado a caída de cascotes no propio paso, co conseguinte risco para os cidadáns.

O mal estado do paso para os peóns pódese apreciar na foto

 Tras máis de dúas semanas dende que o goberno do Partido Popular se comprometera a actuar para resolver a situación e sen que dita actuación se teña producido; dende o BNG vémonos na obriga de denunciar publicamente a deixadez do Goberno local, e apelamos a súa responsabilidade para arranxar esta situación antes de que se teñamos que lamentar algunha desgracia.

O BNG RECOLLEU MÁIS DE 1000 SINATURAS A PROL DA SANIDADE PÚBLICA NUNHA CAMPAÑA BARRIO A BARRIO

 O BNG de Soutomaior rematou a campaña en Defensa da Sanidade Pública coa entrega de máis de 1.000 sinaturas, recollidas ao longo dos barrios do Concello, para apoiar a Iniciativa Lexislativa Popular promovida pola Plataforma SOS Sanidade Pública. Esta campaña, que se prolongou durante dous meses, ten por finalidade frear a política de recortes e privatizacións da Sanidade Pública, impulsada polo Partido Popular.

O Acto Central tivo lugar o venres, 11 de maio, no Centro Social Abrente; e contou coa participación de Fernando Herrero, portavoz municipal do BNG de Soutomaior; e Manolo Moreira, membro da Plataforma SOS Sanidade Pública e da executiva de CIG Saúde. Neste acto defendeuse a necesidade da potenciación da Sanidade Pública con medidas racionalizadoras e cun sistema fiscal realmente progresivo.

Dende o BNG, queremos salientar o apoio da cidadanía a esta iniciativa, e nomeadamente dos militantes e simpatizantes que percorreron os barrios do noso Concello, contribuíndo deste xeito ás 45.000 sinaturas que referendarán a ILP no Parlamento.

O BNG DE SOUTOMAIOR SOLICITA UNHA XUNTA DE PORTAVOCES PARA ABORDAR OS INCIDENTES QUE ESTÁN A ACONTECER NO PEIRAO

·       Os actos de vandalismo sufridos no último mes, incluído o roubo de dúas embarcacións, precisan a intervención do Concello.

·       O continuo aumento do paro en Soutomaior obriga a atender a un sector do mar, que é o que mantén máis postos de traballo no Concello.

O BNG de Soutomaior solicitou este venres a convocatoria dunha Xunta de Portavoces con carácter urxente para buscar unha solución aos graves incidentes que están a sufrir os usuarios do Peirao. Os actos de vandalismo acontecidos no último mes, incluídos o roubo de dúas embarcacións, precisan que o Concello apoie con firmeza as xustas reivindicacións dos usuarios do peirao de Arcade.

Fernando Herrero e Paco Aljan observan o peche dos pantaláns

O BNG pretende que desde o Concello se inste a Portos de Galicia para que, de maneira urxente, arranxe as deficiencias que existen nas instalacións (arranxo de alumeado e barreiras de acceso, mellora do peche dos pantaláns, dotación de cámaras de vixilancia,...). Igualmente, débese informar á Xunta  de Galicia desta situación, co fin de que esta esixa do ente público as actuacións necesarias. Por último, pedimos a mediación do goberno municipal ante a Delegación do Goberno para que os corpos e forzas de seguridade do estado reforcen a vixilancia no peirao de Arcade.

A lamentábel evolución do paro en Soutomaior, con 133 parados máis no último ano, debía ser razón máis que suficiente para que o Goberno Local do PP tomase a iniciativa nestas cuestións. O sector do mar, é nestes momentos o principal motor económico do Concello, e o que mantén un maior número de postos de traballo, e merece polo tanto unha sensibilidade especial coas súas xustas demandas.

O BNG DE SOUTOMAIOR LAMENTA A INCAPACIDADE DO PP PARA ACADAR NOS PLENOS MELLORAS PARA O CONCELLO

·       O PP votou en contra dunha moción nacionalista para acometer unha reforma integral do pavillón da Montesiña.

·       Tamén se opuxo á colocación de paneis nos barrios para comunicar información necesaria e importante para os veciños

Soutomaior, 01 de xuño de 2012. O BNG de Soutomaior levou ao Pleno, o xoves 31 de maio, unha moción para o acondicionamento e mellora do pavillón municipal da Montesiña, que foi rexeitada polos concelleiros do Partido Popular. Dende o BNG, temos que lamentar unha vez máis, a incapacidade do Goberno Local para pactar unha mellora necesaria para o noso Concello, neste caso nunhas instalacións que inda non tiveron unha reforma de importancia dende a súa inauguración, nos anos 90.

O BNG tampouco conseguiu sacar adiante a moción na que se pedía a colocación de paneis nos barrios para comunicar aquela información necesaria e importante para os veciños. Así que panfletos, carteis, avisos, necrolóxicas... seguirán enchendo espazos públicos como paredes, farois, colectores, etc.

Finalmente, o BNG abstívose na votación para a aprobación do Plan Municipal de Voluntariado do Concello. Sospeitamos que  os populares aproveitarán este plan para cubrir con voluntarios, postos de traballo que lles corresponden a empregados públicos.